Vieftigjäörige broèlof van Thei en Marie.

Ein halve iëuw geleeje toen trouwde heej dit paar.
D’n hoèsraod hadde zeej beejein, Pastoër zei: doot ‘t maar.
Hae goof eur eine gooje raod: dink aan ‘t naogeslach.
Kièk nao ‘t veurbeeld in óg straot, dus neet te lang gewach!

Noow viëftig jaore later, zien zeej nog gans gezónd.
Zeej hebbe, ‘t woort wat stil in hoès, ein kat en einen hônd.
Maar as d’r thoès wat is te doon, en det gebeurt hiël dök.
Die twelf van euren aldste zoon, die zien dan wal ens drök.

Refrein: Theike Saorbrook en Marie van Wassum
Zien noow vieftig jaor getrouwd.
Hebbe in dae gansen hampel jaore.
Zich neet eine kiër gehouwd.
Vruuger waas det zoë, det is noow net ‘t stômme:
Twellef kinder, waovan dreej zien naogekômme.
Maar det haet eur saame noëts berouwd.
Vieftig jaor zien zeej getrouwd.

Teks en Meziek: Hay Verberkt/
Ben Verdellen/Sef Gubbels.
Gezônge: Martin Peters/Will Kuhlman.
Rundje Bliërick op de kannepee.

Greekleedje.

`t Is good , det is wal gebleeke,
um ens aaf en toe lekker te greeke.
Maar zorg det-se neet euverdriefs
en det-se met maote kiefs.

D'r zien hiel wat luuj al bezweeke.
die neet op koste halde met greeke.
Dus halt op d'n tied diene mond
want greeke is neet gezond.

Refrein: Weej vraoge leeve mins,
of-se det neet laote kins.
Det gezanik en geklaag,
de leeve langen daag.
Kom, halt ens gauw de kop,
zet ein ander masker op.
`t Is lang neet zoe erg as `t leek.
Halt noow toch op! Halt noow toch op!
Halt op met det gegreek.

Teks en Meziek: Frans Driessen/Ben Verdellen/Sef Gubbels.
Gezonge Frans Burhenne.
Rundje Blierick op de kannepee.

 Leedje van Toni oet Toscane.

Ik zing veur goude mamma mia
veur oude pappa ook.
Veur Theodore e Maria,
familje Saorebrook.
Ik bin ein filio toscano
Met gans mien huid en haar.
Ik zing belcanto italiano.
voor gouden paar.

La signorina krijg van Toni
de pizza as kado.
Spagetti e de macaroni,
salami piccolo.
Ik nam van regio toscano
veur de signore mee:
Chianti vino italiano.
Prosit! Sante!

Refrein: O bello, bello bell amore
van Theo Theo Theodore.
Van bella, bella, bell Marie
van pappa en van mamma mia.
Ik zing granzioso passionato
aria del cupido.
Jubiloso animato
Amoroso delicato.
Discreto intimo.

Teks en Meziek: Frans Driessen./
Ben Verdellen/Sef Gubbels.
Gezonge: Sjaar Canjels.
Rundje Blierick op de kannepee.

Leedje van `t kerkekoer.

Holde aan `t broedspaar Saorbrook.
Vieftig jaor zien zeej beejein.
En al waas d'r auk gen spaorbook,
hae leep toch fijn daen huwelijkstrein.
As d'r ouk aaf en toe ein snaor brook,
eur hermenie en stumming bleef rein.

Daorum zinge weej dees toene,
veur dit prachtig paar van gold.
Daorum meuge zeej heej troene
op eur steul van veureholt.
Noow gaon weej eur trouw beloene.
Kiek ens wat dao kump aangerold.....
ein vaetje baer!

Teks en Meziek: Frans Driessen/
Gezonge: Gregoriaans mannekoer.
Rundje Blierick op de kannepee.

Paries weej komme.

Paries, hald dich maar vas gereid!
Weej komme, ikke met mien broed.
Met traot en trom, wie det zoe geit,
blues de blaoskepel os oet.
Dees reis is os gegaeve,
kedootje van de buurt.
Weej hebbe in os ganse laeve
diene naam wal ens gehuerd.
As-se mich de waeg ouk wees,
ik weit nog neet ens wao-se lees.

Paries, weej gaon neet met d'n trein,
neet met `t vleegtuug of d'n boet.
Dao-aan haet beej os idderein
mier as zeeve braorkes doed.
De bus is konfortabel,
de bis d'r in dreej "heure"
en veur de buurt is det rendabel,
want det is ouk neet zoe deur.
Buurt, bedank heejveur, wie net,
ein reis verzorg door Tante Bet!

Refrein: Paries, Paries, wat hebs dich in hoes!
Veur os had `t ech neet gehoove.
Weej waare al bliej, as de buure heej thoes
ein klein envelopke os goove.
Maar noow't zoe wied is, veuruit met de geit!
Ik haop, as weej truuk zien, det os hoes d'r nog steit!
Paries, veur deeze kier,
veur os hoof det neet mier.

Teks en Meziek: Hay Verberkt/Ben Verdellen/
Sef Gubbels.
Gezonge: Ben Verdellen/Petra Houben.
Rundje Blierick op de kannepee.

Naopraote.

Hae: Weej waere allebei ein jaorke alder.
Dich lops neet mier op schoon met hoege hak.

Zeej: Dich hebs de letsten tied dien veut vuel kalder.
Waorum hebs dich dich neet ein kroek gemak?

Saame: Schei noow maar oet met det gestraevel,
want det kan nog altied nao `t diamant.

Hae: Ik weit nog good det ik dich toen kwaam haole.
naodet's dich met daen and're hads gedans.

Zeej: Dich hads metein op slaag mien hert gestaole.
toen goof `t veur en vlam, weej hadde sjans.

Saame: Dich waas mien lotje veur d'n ierste pries.
Wat zal `t fijn zien met dich in Paries.

Refrein: Wat is d'r in al die jaore.
aan os veurbeejgegaon.
Weej zien wat gries gewaore,
maar det haet os niks gedaon.
Al waas d'r ouk wal ens ein traon,
d'n hemel hadde weej op aerd.
Gezondheid en dich good verstaon
is `t allermeiste waerd.

Teks en Meziek: Hay Verberkt/Ben Verdellen/
Sef Gubbels.
Gezonge: Petra Houben/Ben Verdellen.
Runde Blierick op de kannepee.

De taal van `t lief.

`t Boetelands det is wal moei, allein die taal de's rot!
De raks dao dok mei in de knoei, of hels dien mond op slot.
Beej al die taale is d'r ein, waomei-se wiejer kumps:
de taal van lief en erm en bein en ouk nog van d'n bums.

Met Spaans en Ingels, Duits en Frans halt ik mich gaar neet op.
Ik hoof det stomme boetelands neet ouk nog aan de kop.
Ik kin det misse en ik blief toch internationaal:
ik heb daorveur mien eige lief, det sprik zien eige taal!

Refrein: Ditte is noow kom ens heej.
en dette gank e-weg.
En ditte alles is okeej
en dette bah wat slech.
Wae haet d'r zoevuul pinke pinke,
Gaef mich ouk ens wat.
`k Zal altied aan dich dinke,
dich bis miene leeve schat!

Teks en Meziek: Frans Driessen/BenVerdellen/
Sef Gubbels.
Gezonge: Petra Houben.
Runde Blierick op de kannepee.

Welkom in Paries.

Welkom, welkom in Paries
die schoene waereldstad.
Wae nog niks wet, dae wuerd heej wies.
Heej zuut me nog ens wat!
De Moulin Rouge, Folies Bergeres
en tout de ratteplan.
Veural de manne zeen det gaer,
ze liere d'r nog wat van.
Dus kom geros ens nao Paries
kom nao hotel Chez Jacques.
`t Is betaalbaar heej qua pries
en `t bed fris opgemak.
Madeleine det zorg good veur og,
steit altied veur og klaor.
Wae einmaol os haet opgezoch,
kump truuk, jao idder jaor.

Tossestok Nao de Moulin Rouge,
Nao de Moulin Rouge,
Nao de Moulin Rouge
En de Folies Bergeres.

Teks en Meziek: Wiel Aerts/Ben Verdellen/
Sef Gubbels.
Gezonge: Resi Wolters.
Rundje Blierick op de kannepee.

Place Saint Antoine.

Al bis-se ouk op Montmartre,
of steis-se veur de Kolner Dom.
Maks-se ein heuse reis nao Chartres,
misschien wel nao de Puy de Dome.
De mins dae wilt `t al belaeve
en daorum reis hae vuel en gaer.
Maar alles kump pas ech tot laeve,
as `t umwaeve is met sfeer.

Wiezier is `t waor heej in os laeve:
de mins dae zuk `t dok hiel wied.
Veur wat d'r vlakbeej te belaeve,
is hae al gauw de aandach kwiet.
En toch is os heej vuel gegaeve.
Kiek maar ens rostig um og haer.
Dan merks-se det-se alzelaeve
ouk heej ins preuve schoene sfeer.

Refrein: Dans ens met mich op de Place Saint Antoine.
Loup ens met mich door de Rue Saint Hubert.
Praot ens met mich in zo'n lekker kefee.
Efkes wat preuve, det huert d'r zoe beej.
Laeve en gaeve, det mak minse bliej.
Laeve bringk laeve, mak alles waer niej.
Laeve en gaeve mak bliej, oui oui oui.
Laeve l'amour et la vie.

Teks en Meziek: Giel Geurts.
Gezonge: Ben Verdellen.
Runde Blierick op de kannepee.

Leedje van de seine.

Al iëuwe lang, hiël kalm en griés,
slinger ik mich röstig door Pariés.
Ik heb heej mienen dreij gevônde.
Geluif mich op mien iërewaord.
Det ik hiël wat zoog en hoort
in ein stad vol schoënheid en vol zônde.

Nog jaore lang doon ik mien werk.
Laot minse kiéke paliés em kerk.
Ik laot de buëtjes op mich driéve.
Verleefde ligge aan mien ziej.
Beej eur is idder veurjaor niej.
Veur mich zal alles wal ‘t zelfde bliéve.

Refrein: Dit is ‘t chanson van de Seine.
Dit is l’histoire de Paris.
Dit is ‘t chanson van de Seine.
Dit is l’histoire, l’histoire de Paris.

Teks en Meziek: Wiel Aerts/Ben Verdellen/
Sef Gubbels.
Gezônge: Sjaar Klaassens.
Rundje Bliërick op de kannepee.

Vreejheidslied.

Luuj, al jaore aan ein stök,
slaop ik heej ônder de brök.
Mien matras det is de grônd
en d’n hemel ‘t plafònd.
Nae ik bin gennen erme stakker,
want de zôn die mak mich wakker.
En dao baove kiek de maon.
Zaet gooje nach beej ‘t slaopegaon.

Refrein: Veur gen geld wil ik dit misse.
Alles kin ik zelf beslisse.
Van’t schoënste op dees aerd,
is mich de vreejheid ‘t meiste waerd.
Gluif mich, ik kin gen probleeme.
Hoof niks te gaeve, kan alles neeme.
‘t Deej vuël minse minder pien,
as ze zoë vreej wie de clochard ens kôste zien.

Teks en Meziek: Wiel Aerts/Ben Verdellen/
Sef Gubbels.
Gezônge: Hay Smeets/Martin Peters.
Rundje Bliërick op de kannepee.

De vrolikke Fransmenkes.

Zoë ens in ‘t jaor gaon ze zwerve.
De guns van de maedjes verwerve.
Dan wuërt d’r van hot nao haar gerend.
Met ‘t hert vol temperament.

Laot die dreej kavaliers maar gewaere.
Die weite van appels en paere.
Die weite van d’n hood en van de rand.
En det is allerhand.

Refrein: Dao kômme de vrolikke Fransmenkes aan:
Jean, Pierre en Luc oét de Dordogne.
Ze zien net gewasse, det zuus-te d’r aan,
Die geure nao Eau de Cologne.
Die kwante gezelle zeuke mademaiselles.
Die zien op d’n tour pour l’amour.
Oui, Oui!
En kriége ze hônger dan vinds-se ze heus.
Beej Pommes aux Carottes chez Sur Meuse.

Teks en Meziek: Giel Geurts/Ben Verdellen/
Sef Gubbels.
Gezônge: Hay Crompvoets/
Martin Peters/Hay Smeets.
Rundje Bliërick op de kannepee.

Kiék ens wat ein bein.

Dieke, smaale, lange, kiék die bein ens gaon.
Ikke bin al bliej, as ik gewoën kan bliéve staon.
Ouk nog van die hoëge hakkeschoon.
Ik zoel wal wille weite, wie of die det doon.

Maedjes, pas noow op det d’r neet ein velt.
As ik dao meus staon dan zoel ik barste van de kelt.
Ouk nog weinig aan. Heb ik geliék?
Ik waer direk verkalt as ik d’r maar nao kiëk.

Refrein: Uig, noow kiék ens dao.
Kiék ens wat ein bein:
van de tiëne gans nao baove truuk nao ônder.
Wae duit eur det nao, twië naevenein.
Hadde die d’r gen, det goof gedônder zônder.
Ik traej gewoën maar wat, de’s mich genôg.
Zeej goëje met die bein wies in de lôch. Ein wônder.
Hadde die gen bein um op te staon,
zeej kôste baeter nao hoés toe gaon. (2x)

Teks en Meziek: Hay Verberkt.
Gezônge: Sjraar Klaassens.
Runde Bliërick op de kannepee.

Leedje van Christine en Thei.

Christine:
Ge hoof ôg neet te geneere.
Ik zal ‘t duudlik explikeere.
‘t Is ‘n paar jaor al geleeje’
wie weej ‘t saame efkes deeje.
Jao, jao, noow ziet neet ôngedöldig.
‘t Waas iërlik hiël ônschöldig.
We speulde saame op ‘t graas.
‘k Gluif det ‘t Jeu de Boule waas.

Thei:
Jao, det zals-se wal bedoele:
weej speulde saame Jeu de Boule.
De meugs toch euver spelkes praote!
Allein det vraemp gaon môs-se laote.
Dus mooder, bliéf maar lekker röstig.
Niks gebeurd, kôm heej ik kös dich.
Wat zoel ‘t anders kinne zien.
dan Jeu de Boule met Kristien.

Teks en Meziek: Wiel Aerts/
Ben Verdellen/Sef Gubbels.
Gezônge: Annemarie Verberkt/ Ben Verdellen.
Rundje Bliërick op de kannepee.